ЗОШТО ДА ЈА ПОСЕТИТЕ БУГАРИЈА?

Софија е главен град на Бугарија. Градот изобилува на култура, архитектура и разноликост, во комбинација со голем број музеи, споменици и живописен градски живот. Сето тоа го прави градот задолжително место за посета за секој посетител што доаѓа во Бугарија.

Рилскиот манастир е еден од симболите на земјата и популарна туристичка дестинација. Манастирот лежи во длабочините на планината Рила, меѓу реките Рила и реки Друшлавица, на 1.147 метри надморска височина. Се наоѓа на околу 120 километри од Софија и на 41 километар од Благоевград. Светиот манастир Рила е основан во првата половина од 10 век, а неговата историја е директно поврзана со Св. Иван Рилски, првиот бугарски испосник, кој се населил на ова место и го посветил животот на пост и на молитви.

Велико Трново е град во Северна Бугарија, административен центар на Великотрновската област. Градот се наоѓа во долината на реката Јантра, на растојание од 241 километри од главниот град Софија. Велико Трново е еден од најстарите градови во земјата – неговата историја датира од пред повеќе од пет илјади години, што е докажано со повеќе археолошки ископувања. Подемот на Велико Трново е поврзан со периодот на Второто бугарско царство (1185-1393). Во 1185 година, градот бил прогласен за главен град на обновената Бугарска држава од браќата Асен и Петар, кој го прогласил крајот на византиската власт.

Откриена во 1944 година, Тракиската гробница во Казанлак датира од хеленистичкиот период, кон крајот на 4 век п.н.е. Се наоѓа во близина на Севтополис, стариот тракиски главен град за време на царот Севт III. Гробницата е дел од поголема тракиска некропола. Се состои од тесен ходник и заоблена просторија за погребување, и двете украсени со мурали што ги претставуваат тракиските погребни ритуали и култура. Сликите се најдобро зачуваните уметнички ремек-дела во земјата од хеленистичкиот период.

Роза Дамаскана е името на розата од која се произведува масло, роза што ја прослави Бугарија по производството на најдоброто масло од овој тип во светот. „Родена“ во Дамаск, Сирија, Роза Дамаскана била донесена на бугарска територија во текот на 17 век, кога земјата била дел од Отоманската империја. Оваа роза, со богата и миризлива арома, го пронашла својот втор дом токму во Бугарија. Таа му го дала и името на целиот регион – Долина на розите. Со должина од повеќе од 130 километри на балканскиот планински венец, Долината на розите е опкружена со две планини, кои ги спречуваат студените зимски ветрови и помагаат да се создаде специфична клима. Комбинацијата од неколку фактори, го прави овој регион уникатно место за одгледување на овој вид роза. Секоја година, во првите јунски денови се одбележува Празникот на розата.

Пловдив е вториот по големина град во земјата. Неговата привлечност произлегува од убавината на стариот град, кој во голема мера е реставриран според изгледот од средината на 19 век. Градот изобилува со музеи и уметнички галерии и, за разлика од многу други „стари градови“, во него сè уште има еминентни уметници што живеат и работат на маргините. Градот може да се пофали со тракиски, римски, византиски и бугарски антиквитети, а најимпресивен е Римскиот амфитеатар – најдобро сочуван на Балканот, кој сè уште се користи за изведби.

Бугарија е позната и по развиениот летен туризам на Црното Море. Една од најпознатите летни дестинации и најголем крајбрежен град е Варна.

Мадарскиот коњаник, кој ја претставува фигурата на коњаник што прободува лав со копје, е врежан на карпа, висока речиси 100 метри во близината на селото Мадара во североисточна Бугарија. Мадара бил верски центар во Првото бугарско царство, пред бугарското прифаќање во христијанството во 9 век. Натписите покрај скулптурата зборуваат за настани што се случиле меѓу 705 и 801 година.